DIVERTICULOSE

A diverticulose é unha afección que se pode desenvolver ao longo de todo o tubo dixestivo mais habitualmente localízase no intestino groso. Consiste na aparición duns pequenos sáculos (divertículos) nas paredes colónicas; estes, senón se inflaman e/ou infectan, non son perigosos.

Unha das causas da aparición destes divertículos é a dieta; unha dieta pobre en fibra aumenta significativamente o risco de padecelos.

Segundo os síntomas que produza a diverticulose, pode clasificarse en:

• Diverticulose asíntomática: o doente non presenta síntomas.
• Diverticulose sintomática: o doente presenta dor, inchazón, estrinximento, sangue nas feces...

O diagnóstico desta afección realízase observando a clínica do doente, facendo análises de sangue, exames físicos, probas de diagnóstico pola imaxe (TC, colonospia...). 

Para que a diverticulose non se converta nunha diverticulite (inflamación dos divertículos) abonda con realizar trocos na dieta incrementando a inxesta diaria de fibra (30-35 g/día).

COLITE ULCEROSA

A colite ulcerosa é unha patoloxía autoinmune (é o propio organismo quen produce continuas lesións no colon), crónica e inflamatoria que afecta ao intestino groso, recto e ano.

Esta enfermidade ten carácter multifactorial, é dicir, non está causada por un só factor senón que é consecuencia da interacción complexa de varios dos mesmos (xenéticos, ambientais...).

Os signos e/ou síntomas intestinais serán os derivados da inflamación crónica da parte distal do tubo dixestivo; sangue nas feces, diarreas, incontinencia fecal, sensación de querer defecar aínda despois de habelo feito (tenesmo) ou dor abdominal son algúns deles. Tamén poden darse outros signos e/ou síntomas como febre, taquicardia, perda de peso, vómitos...

En canto ao seu diagnóstico, a colonoscopia é a proba de referencia xa que permite ver a luz intestinal e tomar mostras de tecido.

Por último, aínda que non hai ningún tratamento que cure esta enfermidade, si existen fármacos e recomendacións nutricionais que axudan a controlala.